Publisert i Varden 06.03.07
Tekst: Halvor Ulvenes
-Pedofile har det som plomma i egget
Janne Flittig Jacobsen vart utsett for seksuelle overgrep i elleve år. I går kveld bad ho kommunepolitikarane i Bø om å setje overgrepssaker på kartet. Jacobsen bad politikarane om å vakne.
Bø: -Slik det er i dag har dei pedofile det som plomma i egget ved at sakene vert dyssa ned. Her i Bø er det statistisk 500 kvinner og barn som har vorte utsett for overgrep, sa Flittig Jacobsen i sitt timelange innlegg om si eiga historie. Bø-kvinna vart misbrukt av stebestefaren gjennom mange år.
Manipulert
I det sterke innlegget fortalte ho korleis barn kan fremprovosere seksuelle overgrep. –Barnet veit at det vil skje og framprovoserer handlinga for å bli ferdig, slik at ein kan leike med andre ungar. Overgriparen brukar dette for alt det er verdt. Hans handlingar er nøye planlagte manipulasjonar, var bodskapen hennar til dei folkevalgte.
Mistrudd
Trass i at bestefaren tilstod overgrep og valdtekt, opplevde Flittig Jacobsen at lokalsamfunnet ikkje trudde på henne. –Etter elleve år med overgrep fekk eg høyre at historia mi ikkje var sann, sa den modige kvinna.
Låg straff
Bø-kvinna illustrerte elles korleis samfunnet reagerer på ulike lovbrot. Ho refererte til ein dom der ein overgripar fekk nokre få månader i fengsel, og 20 000 i bot, medan ein person på Skåtøy – som skar ned feil tre med motorsag – fekk 250 000 kroner i bot.
Flittig Jacobsen peika og på at i dei få TV-debattane om temaet får ikkje offera sleppe til. –Me er ikkje verdige til å delta, men ingen kan lese seg til korleis det er for eit barn å bli valdtatt. No må de som politikarar få opp ordskiftet og setje denne saka på dagsorden, understreka Janne Flittig Jacobsen.
|